غير صالحة للإستهلاك الآدمي
الأول اقوللكم الصورة دي متصوره فين عشان تكون فاهم الموضوع. الصورة دي متصورة في مدينة المنصورة بمحافظة الدقليه، و مش بس كده، في شارع أحمد ماهر في حي الجامعة، منطقة من افضل مناطق المنصورة. انا مصور الصورة دي بنفسي من الدور ال ١٣ عشان تكون الصورة واضحة.
شوية معلومات تاريخية الأول:
- المكان ده يومياً بيتملي زبالة بمعدل رهيب، على اخر اليوم بيكون الشارع مقفول من كتر الزباله و طبعاً جميع اشكال و انواع و الوان الحشرات في الصيف بتكون هنا بسبب الزباله، تاني يوم الصبح بيجي بلدوزر يشيل الزبالة اللي بعد ساعات قليلة بترجع زي الاول بدون اي تغيير.
- فيه ست كبيره كده بتبيع تقريباً اي حاجة في الدنيا في العشه اللي تحت في الصوره دي و من الحاجات دي “خضار، بلاستيكات، و بتبيع و تشوي سمك” في وسط هذه الملحمة من الزباله و القذاره
- من اسبوعين كده فيه بلدوزر كسر البيت اللي ورا و المجاري ضربت زي ما حضراتكم شايفين
- كل مده كده بيجي راجل بالغنم و الخرفان بتوعوا يعزمهم على وجبه متينه من الزباله زي ما انتم شايفين
- حزب الحريه و العداله كان مقره الانتخابي في انتخابات الرئاسه كان في المكان البديع ده و ده سبب وجود لوحه الميزان اللي اتعملت سقف للعشه تحت على اليمين
خواطر
- الناس اللي بترمي الزباله هنا من الطبقه المتوسطة و ساعات عمال النظافة بيرموا هنا، الناس دي مش مدركة ابعاد الجريمه اللي بيعملوها في نفسهم، الموضوع مش موضوع اننا ننزل نلم الزباله يا ريس، الناس اللي بترمي الزباله في الشارع هي المشكله، الزباله دي بتتلم كل يوم، الناس بتفكر انه طالما الزباله ريحتها مش بتوصل لبيتها يبقى خلاص مافيش مشاكل.
- الراجل اللي بيأكل الغنم و الخرفان من الزبالة ده و نرجع احنا ناكل اللحمة دي بمنتهى السعاده، لو انت مصدوم من الصوره فعايز اقوللك ان الضمير بقا “ضمير غائب”، اللي عنده ضمير بقا عمله نادره جداً و مش مهم السرطان يزيد لكن المهم الراجل يكسب و يعرف يعيش.
- الست اللي “مش عايشة” و بتبيع في المكان اللي ولادها الصغيرين بيلعبوا فيه كأنه ملاهي (بالمناسبه كان من اسبوعين فيه مراجيح وسط الزباله على فكره) هايطلعوا عاملين ازاي؟ في مسئوليه مين دي؟ و الناس اللي بتشتري السمك اللي كل حشرات ربنا اكلت و شربت عليه ده بيعملوا كده ليه؟ و عشان ارخص جنيه و لا اتنين يضحوا بصحتهم؟
الخلاصة
الصورة دي بتعبر عن مصر دلوقتي، غير صالحة للإستهلاك الآدمي. مستنقع من الامراض و الزباله و المجاري احنا السبب فيها و مجتمع اتضرب في الخلاط مثقفينه بيرموا الزباله عشان تاكلها الخرفان عشان ناكلها تاني عشان يجيلنا سرطان عشان نصرف فلوسنا كلها على العلاج و نموت!
المشكله في مصر مش في النظام المشكله في عموم الناس اللي ضميرها مات و الانتهازيه، كل واحد عايز نفسه و خلاص، مش مهم الباقي، المهم هو يفلت.
هانفضل كده لحد امتى؟